مهارات الحياة والقيم الإنسانية فى 55 دقيقة

مفيش شك ان الشباب هم الثروه الحقيقيه لاي بلد هم الكنز والسلاح اللي تقدر بيه اي بلد تحقق التقدم والرقي اللي يضمن استمرار حضارتها وتقدمها على مر السنين وان اي دوله مهما كان عندها موارد سواء فلوس او ثروات معدنيه او زراعيه او تكنولوجيا او اي نوع من الثروات لو ما عندهاش الثروه البشريه اللي هم الشباب مش ممكن تستفيد من اي موارد تانيه موجوده او مش ممكن تستمر حضارتها وتقدمها بدون الشباب

طيب ايه الحاجه اللى الشباب محتاجينها عشان يكونوا فعلا ثروه لبلادهم اكيد التعليم والمعرفه وتزويدهم بالتكنولوجيا والخبرات العلميه في كل المجالات و دا بالفعل موجود ومتاح جدا في ظل ثوره المعلومات اللي في العالم كله

ولكن رغم التقدم والتطور اللي في العالم كله و رغم الكم الهائل من العلوم والتخصصات وثوره المعلومات ووسائل الاتصال و برغم تطور المستوى العلمي والمعيشي للناس الا اننا بنواجه صعوبات وتحديات كبيرة جدا سواء الحروب والتجويع والكوارث والصراعات والمشاكل السياسيه والاقتصاديه

حتى في الشارع وفي يومنا العادي الناس بقت في صراع مع الحياه حتى الجرائم شكلها بقى مختلف و حاجات عمرنا ما كنا بنسمع عنها زمان وممارسة الحياه اليوميه والاختلاط بين الناس بدون معاناه نفسيه بقى صعب جدا والعلاقات الشخصيه بقت بحذر كل واحد خايف يقرب من اللي حواليه من كتر اللى بنشوفه واللى بنسمعه

يا ترى ايه اللي ناقصنا وايه اللي المفروض يكون موجود بجانب كل التطور في كل المجالات ...لو فكرنا شويه وبصينا في المجتمعات حوالينا هنلاقى اللي ناقص واللى احنا مفتقدينه رغم وجود كل العلم والتكنولوجيا هو حاجه اسمها القيم والمبادئ الانسانيه